ဟွာဆါင္း႓င္ေဍ မါန္စ၀္သာတ၀္(မူးဃွီ႔ဖါန္)
ဟွာၟဆါင္း႓င္လု္ဟွာ ေလ၀္ဍး႓းေ၀့ မါန္စ၀္သာတ၀္ေဍအု္ေဖါဟ္အု္မါ့ ယွင္းယးကါင္ခ၀့္ဏွ္ ခႜါင္ထင္းအင္းစာေ၀့ဍး မာန္စ၀္သာတ၀္ဏွ္ ေ႓့ယို၀္သို၀္ေဆ၀္ၟလွ္။
“မာန္စ၀္သာတ၀္လု္ဟွာယို၀္ ယု္ဍး႓း ဏု္မာဖႜဳံဆိုဒ္ေဖါဟ္အု္ဟွင္ၟယို၀္ အု္ဏိင္းအု္လာ ယိက္ယုဂ္၊ ဏု္ေဖါဟ္ဏု္မါ့ ဏု္ဟွိင္းဏု္ဃွင့္သယ္ လင္ဃွင္ၟလင္ယွင့္ အွ္ကါင္အွ္ခ၀့္ ဖို၀္ၟဖ၀့္ယို၀္ မဲြါဏု္ဆု္ဆံင့္မံင္း အွ္ေ႓့ေသွ္သို၀္လယ့္၊ ဏု္ ေယါ၀္ၟေလါဟ္ေယါ၀္ၟဍံင္ေဏ၀္ၟ ဖႜဳံေ႓့ယု္၀ါသို၀္ ေ႓့အု္ဖႜဳံဟွဴ႔ဟွာသယ္သို၀္ ႓းလယ့္။
အု္သီးေ၀့ဍး မာဆိုဒ္ဆအ္ုဟွင္ၟ ေဏ၀္ၟဏီ့ဏိင္း သိုင့္ဏိင္းဍၚလ၀့္ အု္ခါ့ယုိ၀္ အွ္ထင္းေဍ ကါ(ေသါဟ္လါင္း)၊ အွ္ ထင္းေဍ ဟွိင္းတုဂ္သယ္ဏွ္ ဏု္ဍဳဂ္အွ္႓းသာ ဏု္ေဖါဟ္ဏု္မါ့ေအးဟွ”
ထံင္ဏွ္သို၀္ မါန္စ၀္သာတ၀္ဟွိဳင့္႓း ဟွာၟဆါင္း႓င္ ဆု္ခႜါင္ဏွ္ ခႜါင္ထင္းထါင္ေ၀့
“မဲြါ -----ဟွာၟဆါင္း႓င္၊ ေ႓့ဏု္လ၀္သို၀္ဏွ္ အု္ခါ့ဍးယို၀္ဏွ္ ဖႜဳံေ႓့ဏု္သီး ၀ါသယ္သို၀္ မာအင္းကု္ဆါၟအု္ဟွင္ၟဏွ္ အွ္လု္ပုင္ ဏု္ေဍါဟ္သီ့သီးလုက္ေအး၊ အု္သီးေ၀့ဍး အု္ဆု္ဆံင့္မံင္းဏွ္ မဲြါဍးလု္မိင္၊ ယု္ေ၀့ဍးမဲြါယု္ဆု္ဆံင့္မံင္းဏွ္ မဲြါ ယု္ေဖါဟ္ယု္မါ့ေဍ ယု္ဏင့္ကု္ဆါၟအု္ဟွင္ၟမဲြါေအး၊ မဲြါယု္ဆိုဒ္ေဖါဟ္အု္ဟွင္ၟ”
“ယု္ေဖါဟ္ယု္မါ့ ေဍ ယု္ဏင့္က္ုဆါၟအု္ဟွင္ၟဏွ္ ယွင္းဍးေ၀့၊ ယု္ဖႜဳံဆိုဒ္ေဍ ယု္ဂမႜိဳင္ၟေဖါဟ္သယ္လု္ဖး ေအအွ္႓း ယွဴးယွဴး႓ါ႓ါ ေအသယ္ဌီ့ထင္းဏွ္ကဲလွ္၊ ယု္သာမုက္ယုဂ္ ဏု္ေသွ္ယါ့ဟွ၊ စင္ၟ႓ို၀္ဏွ္ ယု္မု္လ၀္ဏု္ ဆံင့္ဏးေအထီ့ အု္ခါ့ဍးယို၀္ ဖႜဳံေဖါဟ္ ယွင္ေဖါဟ္သယ္လု္ဖး ႓ူးလင္အု္သီးသာ ေ႓့သို၀္ဏု္၀ါသယ္သို၀္ အွ္အးမာၟလွ္၊ မဲြါလ၀္လင္ သာဏွ္ မု္မာေဖွ္ဆုိဒ္ဆေဖါဟ္အု္ဟွင္ၟ မု္ဍဳဂ္ေဖွ္ဆိုဒ္ဆေဖါဟ္အု္ဟွင္ၟ ဆု္ဖံင္ေဖႜ၀္ဆု္ယွဴးဆု္႓ါအု္ဟွင္ၟ ကဲထင္းဆု္ ဏွ္လယ့္၊ လိက္လဲါဆု္ဃွီ႔ဆု္လာသီးမဲြါအု္ေဟွ၀္ ယု္ဍးအွ္ဏင္ၟမိင္ေအး၊ မဲြါမု္မာအင္းထင္း အု္ဏင့္ဆါၟအု္ဟွင္ၟ ေဖါဟ္မါ့အု္ဟွင္ၟပီပီလွ္၊ စင္ၟ႓ို၀္အု္ခါ့ယို၀္ ဖႜဳံေဖါဟ္ယွင္ေဖါဟ္ လု္ဖံင္ဆု္ယွင္းဆု္ဒၱဳက္႓း၊ ေအဟွံင္ဍ၀္ ဖႜဳံယွင္ေဖါဟ္ သယ္လု္ဖး လု္ထင္းထ၀့္႓း၊ လု္ေဏ၀္ၟဆု္ယွဴး႓ါ ဆု္ဖံင္ေဖႜ၀္႓းဏွ္ ဖႜဳံေ႓့ဏု္၀ါသယ္သို၀္ ေဍ ဖႜဳံမာအင္းဏင့္ဆါၟအု္ ဟွင္ၟသယ္လု္ဖးဏွ္ အွ္အးအု္ေခါဟ္စံင္ မဲြါဏု္ေသွ္ယါ့ေဆ၀္ၟဟွ ဟွာၟဆါင္း႓င္ႃ”
ထံင္ဏွ္သို၀္ ဟွာၟဆါင္း႓င္လု္ဟွာ ဟွိဳင့္႓းေ၀့ မါန္စ၀္သာတ၀္ အု္ဆု္ခႜါင္ဆံင္းထင္းေဍ အု္သာေဍါဟ္ထင္းဏွ္တာၟ ခြးလင္ထါင္ေ၀့ အု္ေခါဟ္ဃွဲဳး ခႜါင္ထင္းေ၀့ဍး ႓းလိုင္ေအးေဆ၀္ၟလွ္။
မဲြါမ္ုမဲြါဟွ ဖႜဳံယွင္ေဖါဟ္သီး၊ ေ႓့မါန္စ၀္သာတ၀္လ၀္သို၀္ဏွ္ ဆံင့္မံင္းေဖွ္႓းလါၟဆၚ။
မူးဃွီ႔ဖါန္
(အိင္ထုက္)
(အိင္ထုက္)